Më 26 dhe 27 nëntor 2024, Agjencia për Parandalimin e Korrupsionit (APK), përfaqësuar nga
Drejtori Yll Buleshkaj dhe Shefi i Divizionit për Mbrojtjen e Sinjalizuesve, Milot Shala, mori pjesë
në Konferencën e 23-të Vjetore dhe Asamblenë e Përgjithshme të EPAC/EACN, të mbajtur në
Bukuresht, Rumani.


Ngjarja mblodhi 170 pjesëmarrës nga mbi 30 vende dhe përfaqësues nga organizata
ndërkombëtare si OKB, BE, Prokuroria Evropiane, Europol dhe Departamenti Amerikan i
Drejtësisë. Diskutimet u fokusuan në sfidat e hetimeve ndërkombëtare kundër korrupsionit,
rikuperimin e aseteve dhe përdorimin inovativ të analizës së të dhënave.


Gjatë këtij aktiviteti u miratua Deklarata e Bukureshtit, e cila forcon angazhimet për të luftuar
korrupsionin dhe për të ndërtuar integritet, duke përfshirë gjithë shoqërinë në këtë përpjekje.


Drejtori i APK-së, Yll Buleshkaj, në fjalimin e tij gjatë Asamblesë së Përgjithshme, theksoi
rëndësinë e anëtarësimit të Kosovës në këtë rrjet prestigjioz: “Agjencia për Parandalimin e Korrupsionit e Kosovës kërkon të jetë pjesë e këtij rrjeti për të mësuar nga përvoja e institucioneve të tjera dhe për të kontribuar me përvojat tona. Korrupsioni nuk njeh kufij dhe lufta kundër tij kërkon një përgjigje të përbashkët.”

Ai gjithashtu shtoi: “Rrjeti EPAC/EACN është më shumë se një bashkëpunim institucional; është një familje ku çdo zë e forcon tërësinë. Ne synojmë të sjellim në këtë rrjet energjinë e reformave dhe përkushtimin për të mbrojtur transparencën, llogaridhënien dhe vlerat demokratike.”


EPAC (Partnerët Evropianë Kundër Korrupsionit) dhe EACN (Rrjeti Evropian i Pikave të Kontaktit
Kundër Korrupsionit) janë forume të pavarura që bashkojnë autoritetet kundër korrupsionit
dhe organet mbikëqyrëse policore nga shtetet anëtare të Këshillit të Evropës dhe Bashkimit
Evropian. Me një qëllim të përbashkët për të parandaluar dhe luftuar korrupsionin, EPAC/EACN
shërben si platformë për shkëmbimin e përvojave, praktikave më të mira dhe promovimin e
standardeve ndërkombëtare për integritet dhe transparencë.


Anëtarësimi i APK-së në rrjetin EPAC/EACN do të ofrojë përfitime të shumta, duke përfshirë:

  •  Mundësinë për të ndarë dhe mësuar nga praktikat më të mira evropiane.
  •  Bashkëpunim më të ngushtë në hetimet ndërkombëtare kundër korrupsionit.
  •  Përmirësimin e kapaciteteve përmes trajnimeve dhe shkëmbimit të përvojave me institucione partnere.